Godt nyttår, og takk for det gamle!
Nyttårsforset, seier du? Eg trur faktisk ikkje eg har så mange i år. Sjølvsagt skal eg prøve å vere flink å trene, lese så godt eg kan på pensum, møte til alle forelesningane mine og ete sunt. Dei forseta har eg kvart år, utan at det er naudsynt at eg startar frå 1. nyttårsdag. Eg kan like gjerne starte neste onsdag. Eller som eg brukar å sei til meg sjølv: -I morgon. I morgon skal eg ikkje ete ein einaste sjokolade, og stå opp på eit tidspunkt der normale mennesker kryp ut av loppekassane sine.
Det skjer aldri. Kanskje klarar eg det ein dag, maxx to, men så er eg tilbake med ei sjokoladeplate framfor pc’en klokka fire om ettermiddagen, når eg akkurat har stått opp. Men neste måndag. Neste måndag skal eg starte på nytt, og då skal eg absolutt halde det eg har lova meg sjølv.
Eit nyttårsforset har eg derimot sett meg. Eg skal tilbake til bloggen min. Eg skal byrje å blogge igjen. Sånn på ordentleg; ikkje berre eit innlegg ein gong i månaden der eg lovar meg sjølv og omverda at eg skal ta meg saman. Men eit innlegg i veka. Fast. Det burde eg vel klare. Eg treng den vesle greia mi med å skrive, sjølv om det kanskje ikkje gir allverdens meining. Men å setje ord på ting. Tenkje gjennom ting. La hjernen tømme seg litt.
Eg satsar på å få meg ein studiodag sånn kring skulestart, når håret mitt har gått frå å vere grå/rosa/lilla/brunt til å få ein klar lillafarge igjen. Eit par tøffe bilete, og nytt design. Det kan vere det hjelp litt på skrivetrongen, for designet eg har no er ikkje akkurat så mykje å skryte av…. Så får me sjå. Atter ein gong: Godt nyttår! La oss håpe at verda framleis står når me vaknar opp den 22. desember i år! ^^
